Hisia aweka wazi mipango

 

Baada ya kumalizika kwa shindano kubwa la Tuskert Project Fame Season 6 wiki iliyopita, Mshiriki pekee aliyekuwa anapeperusha Bendera ya Tanzania katika mashindano hayo na kuonyesha uwezo wa ajabu wa kuimba, Hisia tayari amekwishatua nchini akiwa amejipanga vilivyo kuendeleza moto wa kipaji chake kikubwa katika muziki.

 

eNewz kama ilivyo ada, tukafanya yetu na kuwa kati ya watu wa kwanza kabisa kukutana na Hisia ambapo katika mahojiano naye, msanii huyu amesema kuwa safari yake ya muziki ndio kwanza imeshika kasi na anatarajia kuachia kazi zake mpya hivi karibuni zikiwepo zile zilizofanyika nchini Kenya na mtayarishaji mahiri, Musyoka na nyingine kutoka hapa hapa Tanzania B Hits na studio nyingine kubwa.

 

Vilevile, kutokana na kuwa kivutio kikubwa kwa mashabiki wa kike, Hisia akaeleza juu ya msimamo wa mahusiano yake kwa sasa ambapo amesema kuna mtu (girlfriend) ambaye hakupenda kutoa taarifa zake za ndani zaidi.

 

Na katika mkutano wa waandishi wa habari kwa ajili ya kurudisha shukrani kwa vyombo vya habari na mashabiki kwa sapoti yao kwa shindano mapema jana, Tusker wakatangaza kuendelea kuwa na Hisia pamoja na Angel ambaye pia aliwakilisha Tanzania katika mashindano haya, kama mabalozi wake kwa kipindi cha mwaka mmoja.